“من يوم ما خبط على باب بيتي وطلبني من أهلي وأنا مش مصدقة، كنت معجبة بيه من زمان وأخيرا حس بي، بس بعد الخطوبة اتغير قوي. أنا من بيت الراجل فيه مسئول عن كل حاجة؛ الطلبات و المسئوليات و الفلوس، بعد ما اتخطبت اكتشفت أن خطيبي حاجة تانية خالص. كان بيقول لي:” أنا بحب اللايف ستايل بتاع الأجانب، الست والراجل يشيلوا المسئولية بالنص.”هو بيتكلم عن المسئولية المادية، ماجابش سيرة أنه يتحمل معايا مسئولية البيت بالنص و لما باسأله بيقول لي:” لو عنده وقت وأنا تعبانة هيساعدني.” بيحطني في مواقف غريبة بتخليني متلخبطه قوي و في صراع بين حبي له و بين نفوري من أفكاره وتصرفاته. دايماً يديني محاضرات و يقول لي: ” مش مقبول عندي أن الطرف التاني ما يشيلش معايا ويعتمد علي لوحدي في الفلوس”. وكمان بيزعل لو ما عزمتوش برة و لو ما جبتلوش هدايا زي ما بيجيب لي. ولما يبقى فيه مناسبة واستنى هديته عشان أتباهى به قدام أهلي يقول لي أنتِ مادية قوي. الكلام ده بيهز صورته قدامي و بيزعلني قوي. أنا باشتغل و ليّ مرتبي ومن ساعة ما مرتبي كبر وأنا باصرف على نفسي كل طلباتي ومش باقول لبابا عن أي حاجة أنا نفسي فيها، وده كان بيحسسني بالاستقلالية.

أنا قدرت أعيش مستقلة مادياُ في بيت أبويا بدون أي إحساس بالضرر فأنا مليانة  باحساس الامتنان لأبويا اللي لو عرف أني عايزة حاجة بيجيبها عن طيب خاطر مهما كلفته، فأنا واخدة على أني أصرف على نفسي من أكتر من سنتين بس ده ما يمنعش أن بابا دايماً بيوفرلي اللي محتاجاه أنا وأمي وإخواتي، هوبالنسبه لنا الضهر والسند والأمان. دي الصورة اللي أنا عشتها في بيتي وكنت أحب أعيشها مع شريك حياتي.عايزة أكمل معه لأني حبيته بس خايفة لما أتجوزه أكرهه وأشوفه مش راجل زي أبويا لأن أصلا من دلوقتي صورته في عينيا مهزوزة. كنت بأقول له الدين بيفرض النفقة بالكامل على الراجل، وقلت بقى هيستجيب لأنه متدين لقيته بيقول لي : ” عارف عشان كده بأقول لك من الأول عشان العقد شريعة المتعاقدين”. وبيتحجج أن مفيش واحد من صحابه مش عامل كده سواء اللي اتجوزوا أو المخطوبين. كلهم عاجبهم النموذج الغربي وعايزين يعيشوا في بيوتهم كل واحد يدفع النص.هو مُصر أن هي دي شراكة الحياة، مش واحد يتعب و واحد ياخد على الجاهز. ومعتقد أن هي دي المودة والرحمة اللي هو عايزها مني. النقطه دي عامله حاجز كبير بيني و بينه و مخلياني مش قادرة أكمل. أعمل ايه ؟! أكمل ولا لأ؟
القصة انتهت بحيرة وبسؤال أكمل ولا لا؟
عارفين أن القرار ده ممكن يكون أصعب قرارمرعليكم وعارفين أن ممكن يترتب عليه ندم طول حياتكم لو كان غلط، عشان كده خدمة الاستشارات للمقبلين على الزواج بتحللكم المشكلة دي. كل اتنين مرتبطين عندهم مشاكل زي دي أو غيرها هيقدروا يعرفوا القرار الصحيح لإكمال العلاقة ولا لأ مع خدمة استشارات المقبلين على الزواج وهيقدروا يعرفوا الطرق الصحيحة لحل المشكلات.