إحنا ممكن نتنازل في الحب لما يكون التعب راجع علينا إحنا بس لما يعود على اللي حوالينا كمان هنا بيبقى لازم نقف و نقول بس.
أنا متجوزة من 15 سنة جوزي مركزه مرموق و ناجح و حياتنا الماديه كويسه قوي و الناس بيحسدونا. حملت على طول و جبت تلات اولاد جم ورا بعض وبالتالي بقيت مشغولة جدًا من اول جوازي.
جوزي راجل متدين وحافظ للقرآن بس مشكلته إنه عصبي جدًا، وأنا كنت بتحمل عصبيته دي واعديها لأني بحبه بس مع الوقت عصبيته بقت تطلع على ولادي وللأسف مبقتش عصبيه وزعيق بس الموضوع تحول لإهانة وضرب!
اخر ولدين اتعذبت معهم عشان عندهم تبول لا ارادي بسبب اللي بيشوفوه من طريقة والدهم و عصبيته ، كلهم كانوا بيخافوا منه لدرجة إنهم مش بيحبوه وبيتمنوا لو انفصل وابعد عنه النهاردة قبل بكرة.
أنا فعلًا كنت اتطلقت منه مرة بعد اخر ولاده على طول بسبب انشغالي بالتلات اطفال وهم في سن صغيره جدا.
هو شاف إني هملاه ومركزة مع أولادي بشكل ضايقه فطلقني . كان قصده يؤدبني عشان ما اقصرش في خدمته و اهتمامي به بسبب الاولاد .انا شلت منه لاني اصلا كنت منتظره منه يشيل معايا حمل تلات اطفال لكنه لا يمكن يساعدني في اي حاجه تخصهم و كان رامي على الحمل كله. و كمان بيلومني علة اقل هفة تقصير و ختمت انه كسر نفسي و طلقني في وقت ما كنتش اقدر اثأر فيه لنفسي و انا ولادي صغيرين و مش فاضيه حتى افكر اعمل ايه .بعد ما طلقني رجعني و انا قبلت لاني كنت لسه بحبه برغم قسوته .و كمان عشان عارفه انه هو كمان بيحبني جدا ودا شيء أنا واثقة منه لحد النهارده و ده الحاجه اللي دايما كانت بتطبطب علي في اي مشكله باقابلها معه.
هو طيب جدًا بس مشكلته العصبية وسوء معاملته للأولاد . كلهم بيخافوا منه ومش بيحبوه بسبب طريقة معاملته معاهم وعدم تعديته للصغيرة قبل الكبيرة يعني أنا بحاول أفهمهم لكن هو الضرب وسيلة الشرح الوحيدة عنه.
ابني الكبير جالي من كام يوم وهو بيبص لي بنظرة عتاب وبيقولي مش هو دا اللي بيحبك وبيحبنا!
ساعتها قلت لها اه، لقيته بيرد بتشفي وهي بيقولي طب ابقي شوفِ بقى هو بيعمل إيه من وراكِ!
سألته بيعمل إيه؟، قال لي أنا مش هتكلم بس ابقي شوفِ أو اسألي أخواتي وهمَ يقولولك، دا مش أول مرة يحصل بس أنا زهقت وكان لازم اقولك!
أنا سمعت الجملتين دول منه وأنا بدعي ربنا ما يكونوش شافوا اللي أنا عارفاه من زمان وساكته عليه وبدعي ربنا ليل نهار يبطله؛ لكن للأسف طلع هو.
_بابا بيشوف حاجات وحشة و ناس عريانة و افلام بورن. مع انه بيضربنا لو شافنا بنتفرج على مسلسلات اجنبيه عاديه . اللي بيزعق لنا عليه ميجيش حاجة جنب اللي بيشوفه يا ماما!
الجملة سمعتها من أولادي التلاتة؛ حستها مزقت قلبي؛ أنا عارفة دا من زمان و كلمته أكتر من مرة فيه وبعت له حاجات تساعده عشان يتعالج . زمان اول ما عرفت انه بيعمل كده كنت بحرص إني اهتم بنفسي زيادة عن اللزوم عشان كنت فاكرة إني السبب و عايزه اخده من مشاهدة الافلام الاباحيه دي ؛ لكن مع الوقت اكتشفت إن العيب مش مني هو اللي عنده مشكله ومش عايز يحلها، أنا كنت ساكته ومستسلمه وبقول ربنا هيهديه لكن بعد اللي حصل مع أولادي أنا بقيت خايفة ومرعوبة عليهم ومش عارفة أعمل إيه؛ أنا وهو بنحب بعض لكن لو دا هيدمر أولادي يبقى مع السلامة، أنا معنديش مانع اطلق في مقابل إني انقذهم من الهلاك دا.
أنا جيتلك تساعديني عشان مش عارفة أعمل إيه فبالله عليكِ تحطيني على الطريق اللي ينقذني وينقذ أولادي وبيتي.
التعليق :
للأسف انتشار مشاهدة الإباحيه دا موضوع سائد بنسبة كبيرة جدًا بين الشباب والأطفال حسب الإحصائيات. و للاسف الأذى نابع من القدوه السيئه في البيت و اصحاب السوء.
مشكلتك مالهاش حل غير الطلاق لو الاب مصر على ادمان مشاهدة الاباحيه.
الامل ممكن يتولد من جديد لو هو اعلن و قام بخطوات جديه في طلب العلاج من هذا الادمان بقوه و اصرار. و طبعا مشوار العلاج لن يقل عن سنه ليصبح متعافي. فيه خطوات لازم ناخدها خلال السنه دي ليتأكد الاب انه لا تراجع عن هذا المشوار و ان الموضوع مش هينتهي بشوية وعود جوفاء.
اول و اهم خطوه : إن حضرتك هتصارحيه باللي حصل و هتصري انكم تعملوا وقفه و انه خلال الوقفه دي الاب لازم يسيب البيت . بلاش كلامك يكون هجومي.قولي له إنك بتحبيه وانه طيب وبيعمل حاجات كويسة كتير عشانكم لكن مش هتقدري تكملي معاه لو اصر ان كل حاجه تفضل على حالها بدون تغيير . و هتخاطبي فيه الضمير انه كشخص بيخاف ربنا مش ممكن يقبل على نفسه انه تيجي لحظة لقائه بربه و هو لسه بيقوم بالمعصيه الكبيره دي. و ان ده كان انذار من رينا له عشان يبدا رحلة التوبه.
و قولي له انك واثقه في ضميره و انه هيحافظ على الامانه اللي هي الاولاد لان دا أصبح خطر على ضمير الأولاد و نفسيتهم . و لازم تفهميه مدى الكارثة اللي هتحصل للولاد لو الامر مر بميوعه بدون تصحيح .
هو في الحالة دي هيعرض عليكِ إنه يتعالج و هو في البيت على سبيل إنك تدي له فرصة لكن إنتِ هتصري إنه يسيب البيت فتره و لما تلاقي خطوات جاده منه في العلاج هتنفذي تعليمات الطبيب المعالج ، عشان ما يحصلش زي كل مرة و يبقى موقف ويعدي وخلاص.
ثانيا: الاب لازم يواجه ابنه و يقول له : انا فعلا غلطت و قررت استغفر ربنا و اتوب توبه نصوحه. انا ادمنت و انا مراهق لان ماحدش من اهلي علمني و حذرني فوقعت في المشكله دي و ادركت المصيبه و انا في الجامعه. انا كنت باخاف عليكم حد فيكم يقع في المصيبه دي فكنت شديد معكم و باراقبكم ليل و نهار لحبي فيكم و خوفي عليكم. الحمد لله ان ربنا نبهني عشان انا تعبت قوي و مش قادر اتخيل اني اقابل ربنا و انا باعمل المعصيه الشديده دي. انا هاسيب البيت فتره و هابتدي فترة علاج و مش هارجع الا لما اكون تعافيت. و مش هاقصر معاكم في الفتره دي و محتاج دعمكم و دعواتكم.
و طبعا ما ينفعش يكون كلام الاب مجرد كلمات بدون فعل و عليه فلازم يسيب البيت فعليا فتره عشان الاولاد يعرفوا ان الامر ده غير مقبول و ان التغيير واجب و حتمي.
ثالثا : الأولاد لازم تتكلمي معاهم بصيغة التهدئة زي إنك تقوليلهم إن بابا وقع في الغلطه دي عشان محدش علمه و هو صغير. لكن الحمد لله انا معكم و باعلمكم و باحافظ عليكم. و واثقه انكم اتعلمتوا من الدرس ده و ان ده هيحميكم من انكم تقعوا في الغلطه دي اللي بيقع فيها صحابكم حواليكم . انتوا حاجه تانيه غير كل الناس و ربنا نبهكم عشان يحميكم من الوقوع في الغلط الخطير ده .وإحنا لازم نساعد بابا عشان يتخلص من دا وما يعملهوش تاني . بابا بيحبنا و احنا هنقف جنبه. دي محنه و كلنا هنقف جنب بعض فيها لغاية لما تعدي.
رابعا: للاسف لازم يكون واضح لك و للاب ان اي ميوعه في موقفه أو رفضه للحل هتودينا للحل المؤسف و هو الطلاق بدون اي تراجع.
*لو مشكلتك زي المشكله دي الجا الى الحل فورا. احجز استشاره زوجيه و ابدا في حل المشكله و اتخاذ القرارات التصحيحيه بصوره محترفه.
