هي بنت الجيران و متربيين زي الاخوات بالضبط. و كبرنا و لنا صحاب مشتركين و بنخرج كلنا شله واحده مع بعض. دخلنا الجامعه سوا. في تالته جامعه صاحبي اعجب بها و حبها و قال لها انه بيحبها و عايز يتقدم لها. و لما سالتني راي اتصدمت لكن شجعتها توافق عليه. بس استغربت قوي بعدها لاني حسيت اني متضايق و لحظتها اكتشفت انها مش اختي و اني بحبها.
لما هو كلم مامتها و العيلتين اتقابلوا. حسيت بغيره و اني مخنوق و متضايق. لما عملوا حفلة خطوبه كنت حاسس اني باموت حرفيا و قررت اني لازم ابعد و خصوصا انه امكانياته احسن من امكانياتي و هو اكبر مني بسنه و جاهز عني.
فضلت جنبها بالعب دور اخوها لغاية بعد سنه خطوبه هي بدات تشتكي منه كتير و كانت بتحكي لي و انا كنت بانصحها تكسبه ازاي بس كل ده كان من ورا قلبي.
مره اتصدمت انها قالت لي : انا مش مكمله عشان مقتنعه به. انا مكمله عشان انت بتقول لي انه كويس.
اتخضيت قوي من الجمله. ايه ده هو انا فعلا شايف انه كويس ؟ اكتشفت اني كنت طول المده دي باعمل كل حاجه عشان سبب واحد ان ماحدش يعرف اني بحبها. حسيت اني هاغرقها معايا فانسحبت و قلت لها : انا ما اعرفش هو كويس و الا لا . لكن انا بس حاسس انك بتحبيه و سعادتك تهمني فعشان كده بانصحك تكسبيه ازاي. انا باعمل كده عشانك مش عشان هو كويس.
هي سكتت.
من بعدها انا بعدت و هي ماعادتش بتكلمني في الموضوع ده. و انا محتار . هي بطلت تكلمني ليه في المضوع ده ؟ هي حسيت بحقيقة مشاعري فبعدت عني و الا هي حسيت اني بانصحها من غير ما اكون مقتنع من الشخص فاتخضيت مني؟
انا مش عارف الصح ايه. بس انا فعلا بحبها و عايزها و مش قادر اتكلم. و تعبت قوي من تمثيل دور اني اخوها. و هو فعلا شخصيه سخيفه و متحكم و هيتعبها معه.
التعليق:
دور بطولي اللي انت لعبته ده. انا باحترم موقفك جدا. الشيء اللي لا يمكن اوافق عليه اي حد في اي علاقه انه يبعت عن نفسه رساله غلط.
لو كنت سالتني من اول المشكله اول ما اخدت بالك ان فيه حد مهتم بالبنت اللي انت مهتم بها كنت هاقول لك قل لها و الظروف بتتغير ولو شاريينك يستحملوا ظروفك لحد ما تجهز .
لكن مادام سكت لحد ما هو اتقدم قبلك يبقى كان المفروض تنسحب تماما من الصوره. طبعا في الحديث ” لا يخطب احدكم على خطبة اخيه” . فكان الموقف اللي اخدته هيكون رائع لو كنت انسحبت و بس. ما كنتش تكمل الدور بانك تمثل دور الاخ. لان مش دي حقيقة اللي جواك.
عموما الحمد لله ان ده حصل خلاص. انت فعليا انسحبت من تمثيل الدور ده. اثبت بقى عشان هي تعرف تفكر صح بدون ما حد يلخبط لها تفكيرها و يحاول يبيع لها فكره مش حقيقيه ان كل الشباب كده و ان المشكله بس ان هي محتاجه تفهم الرجل مش انه ممكن يكون فعليا مش مناسب لها و لسمات شخصيتها.
هي كده هتفكر بهدوء و مفيش قدامها غير حل من اتنين. اما انها تقرر انها مش مرتاحه في العلاقه دي و تقررتنسحب. و اما انها تكمل لاساب تخصهاهي مش اسباب مصطنعه انت كنت بتوهمها بها عشان تهرب من فكرة انك عايزها زوجه و حبيبه مش اخت.
لو هي انسحبت من خطوبتها هيبقى عليك انك تستنى لما مشاعرها تهدا من التجربه دي و ساعتها هتتقدم لها بدورك الحقيقي كشريك لحياتها في المستقبل بدون اي تمثيل لاي دور تاني.
لو هي كملت يبقى تكمل دورك البطولي . و ما تظهرش في دور الاخ ده تاني في المستقبل و تلخبط لها حياتها بنصايح قد تكون مش في محلها ببساطه لانها مش صادقه. و عشان كمان ما تتعبش نفسك بدور بيكبر الصراع جواك بالمبالغه في اخفاء مشاعرك.
المشاعر زيها زي اي طاقه و بيمشي عليها قوانين الطاقه في الطبيعه. كبت الطاقه يؤدي الى كوارث بيئيه زي الزلازل و البراكين. كبت المشاعر كمان بيؤدي الى كوارث صحيه و نفسيه.
الخلاصه انسحب و سيب لها القرار بدون تشويش.
دورك لسه ماجاش معها لكن دورك مع نفسك انك تحميها طول الوقت من اي صراع.
ادي لنفسك فرصه تهدا دلوقتي. لما يتضح موقفها ابقى شوف الانسب لك و اعمله . ولو حصل و هي كملت ما تزعلش . هتحتاج فتره للتعافي من اثار التجربه. و بعدها هتكون شخص انضج كتير و مستعد قوي لتجربه جديده اقوى و اسعد و انجح .
و الدرس اللي انت اتعلمته انك دايما تكون واضح و اللي جواك مرئي و مفهوم للي حواليك.
