احبابي المتجوزين..
و اللي على وش جواز..
و اللي لسه ما فكروش في الجواز..
و اللي اتجوزوا و انفصلوا ..
و اللي اتجوزوا و كملوا و خلفوا ..
و اللي اتجوزوا و و كملوا و خلفوا و ابتدوا مع ولادهم مشوار المدرسه الرهيب ..
و اللي ولادهم في سن المراهقه ..
و اللي ولادهم في سن الجامعه ..
و اللي بيختار لولاده عرايس او بيقبل لهم عرسان..
وكل واحد فكر في يوم من الايام يقرب من علاقه اسريه من قريب او من بعيد..
عشت مع كل واحد من الناس دول من 2006 الى اليوم بكل سؤال مر بخياله و كان محتاج لاجابه. .
بكل رغبه – مشروعه طبعا 😊 – اتمناها و كان مش عارف تتحقق ازاي .
وبكل حلم حلمه لنفسه او لحد من حبايبه بكل تعقيدات العلاقات من اولها لاخرها.
الحمد لله حصيلة الاف القصص اللي عشتها معاكم كان مؤسسة بتعمل ليل و نهار انها تساعدكم تلاقوا الكنز.
الكنز اللي انتوا شاقيانين و راه ليل و نهار . كنز السعاده اللي بتدورا عليها مع كل لحظة حب بتعيشوها او بتدورا عليها في علاقه مهمه بتفنوا عمركم فيها سواءا كان حب الحبيب او حب الولد او حب الاهل او حب الصديق.
عايزه اقول لكم ان كل مقال هتقروه في ال BLOG فيه اصواتكم الحقيقيه من ارض الواقع. اتعلمت من كل صوت سمعته منكم و حسيت به و فهمته و ساعدته يحل مشكلته.
ابعتوا لنا و احنا دايما هنحول حيرتكم لاجابات طلعنا بها من خبرتنا من 2006 لغاية النهارده
واثقين ان الاجابات دي هتنور لكم طريقكم ان شاء الله و نتمنى لو نقدر نقدم اكتر و اكتر.
اكيد انتوا كمان بنيتوا معنا الخبره على مر سنين من خلال تواجدنا معاكم على ارض الواقع و من خلال صفحاتنا على السوشال ميديا.
و عرفتوا ان العلاقات مش شوية مشاعر و خلاص على كده.
العلاقات عباره عن شوية افكار معقده حبتين و الافكار بتولد مشاعر .
و لازم عشان نحافظ على نضارة المشاعر يكون عندنا مهارات تواصل.
نضرب كل ده بقى في الخلاط و يطلع لنا الكنز. او الحب و السعاده و الاستقرار اللي الكل بيدور عليهم .
الموضوع مش بسيط لكنه كمان مش صعب. هو بس محتاج تعلم زيه زي اي حاجه مهمه في حياتك.
الخلاصه: السعاده في الحب و الحب صناعه و الصناعه محتاجه صانع فاهم و ماهر .
و احنا دورنا كمؤسسه عريقه في مجال العلاقات الاسريه اننا نعلم الصانع و نخليه ماهر و لو حصل اي عطل في صناعته نعمل له الصيانه اللي ترجعه احسن من الاول .
بس كده . احنا موجودين في ضهرك دايما. كل اللي مطلوب منك تخبط على بابنا و تنورنا.
