شفت 15 عريس. و رفضتهم كلهم. خايفه اختار غلط.
لغاية لما قابلته و اتخطبنا من شهور.
هو كان زميلي في الجامعه. اعرفه كويس. اتقابلنا تاني بعد ما خلصنا جامعه بسنتين.
درسنا بعض و حسيت ان عندي القبول له و مستريحه له.
هو وسيم و كل الناس بتشكر في شكله و اخلاقه . بس انا فضلت فتره مش عارفه انجذب ليه.
هو شكلا مش الشخص اللي في دماغي. انا بحب الشخص الطويل و جسمه ضخم و هو طولي و نحيف. و ده فارق معايا جدا.
اهلي و صحابي قالوا لي بلاش سطحيه . الشكل مش مهم مادام هو انسان كويس.
حاولت ما افكرش في الموضوع و اركز على شخصيته .
هو بيحبني قوي و بيراضيني لو زعلت منه. و بيهتم بي جدا و دمه خفيف و ناجح في شغله و مظهره مناسب و مشرفني قدام عيلتي.
مشكلتي اني كل ما نبقى خارجين و اشوف حد طويل و ضخم باحس اني متردده .
خايفه بعد الجواز و التحديات بتاعته افقد انجذابي له تماما.
مش عارفه اكمل و الا لا .
التعليق:
الشكل نقطه جوهريه و عمرها ما اخدت حقها من الاهتمام في الاختيار و الناس بتعتبرها مشكله تافهه لكن على ارض الواقع هي مشكله كبيره و بتسيب اثر كبير في الزيجات اللي بتقابلنا في شغلنا.
خطورة الشكل انه بيعبر عن ذوقك في الانسان اللي المفترض انك هتكمل معه عمرك كله.
ممكن ذوقك يتغير في حاجات مش جوهريه بالنسبه لك بس عادة بيفضل ثابت في حاجات طول الوقت.
و عشان كده لازم نحترم النقطه دي. و بلاش حد يتجوز شخص مناسب لكن مش شايفه حلو في عينيه.
و ياما جوازات قامت و العريس مش شايف العروسه حلوه في عينيه هو رغم انها في عينين الناس قمر . و ياما برده عرايس اتجوزوا عرسان في عينين الناس في منتهى الوسامه رغم ان العروسه نفسها مش معجبه بشكل عريسها.
الناس بتقول للشباب بكره بعد الجواز هتتعود على شكل شريك حياتك. مع ان الواقع بيقول غير كده.
بس ده مش مع كل الناس لان مش كل الناس يهمها الشكل بنفس الدرجه.
لكن الناس اللي شايفين الشكل مهم قوي ما ينفعش يتجاهلوا ذوقهم في النقطه دي.
ايه اللي يقول لك درجة اهمية الشكل بالنسبه لك ايه ؟ خد الميتر ده قيس به :
لو انت طول الوقت واخد بالك من الموضوع ده و مش قادر تشوف الشخص اللي اختارته حلو . يبقى موضوع الشكل ده درجة اهميته عندك كبيره جدا و بلاش منها الجوازه دي. اصلها مش شربة خروع. و الشخص اللي هتحبسه معك في جوازه من حقه يشوف نفسه في عينيك من اجمل الناس.
سيبه فيه حد تاني غيرك هيشوفه قمر 14.
لو انت مش بتفكر في مسالة الشكل دي الا لما تكون زعلان منه بس . يبقى الموضوع درجة اهميته عندك متوسطه.
و ممكن تتجوزوا و كل ما يعمل عندك رصيد اكبر كل ما النقطه دي اهميتها هتتلاشى في عينيك بشرط انكم كخطيبين و كزوجين في المستقبل يكون رصيد العلاقه بينكم بيزيد بالتواصل الجيد مش بيقل.
لو انت اصلا مش بتفكر في منطقة الشكل دي و الناس هي اللي بتقول لك شكله مش حلو قوي لكن انت مش شايف ده يبقى كمل على بركة الله . دي نقطه اصلا مش جوهريه عندك و مادام الشخص عاجبك و اخلاقه كويسه ومرتاح له و فيه تكافؤ بينكم سيبك من كلام الناس.
بس كده . الموضوع سهل و بسيط اهه.
المطلوب بقى اننا كمختصين نساعد بطلة القصه تحدد هي اي نوع من التلاته . و بناءا عليه تقدر تحدد ميعاد الفرح او تلغيه.
الانسجام هو الشعور اللي بتدور عليه في علاقتك بشريك حياتك فما ينفعش تتعامل مع نقطه مهمه زي دي باستهانه. لانها احد عناصر الانسجام بين اي زوجين في بداية جوازهم و في منتصف عمر الجواز و في كل لحظه منه للنهايه.
اتجوز بس الشخص اللي تحس انه مالي عينك.
#استشارات_للمقبلين_على_الزواج
#اختبارات_ماقبل_ الزواج_لتحديد_شريك_الحياه_المناسب
