خطبت بنت من اربع شهور، هي بنت مميزة وفيها كل الصفات الحلوة، وأنا فعلًا بدأت أحبها، لكن للأسف عندها مشكلة واحدة مخلياني مقلق من اتمام الجوازه دي!
أنا حاولت اكلمها فيها أكتر من مرة لكن هي شايفة إنها صح وإن أنا اللي غلط. بتقولي إنتَ عايز تتجوز واحدة معدومة الشخصية وأنا مش كدا ومش هبقى كدا ولازم تحاول تتقبلني زي ما أنا!
أنا شايفها مثالية في كل حاجة آدب وأخلاق و علم وتوافق على جميع المستويات، شخصية مريحة فعلاً لكن بحكم إنها معيدة فواخده على التعامل عادي مع رجاله وأنا مش حابب كدا أو مش كدا بالظبط يعني أنا مش حابب اكون في مكان وتلغي وجودي وتتكلم هيَّ.
يعني يوم ما كنا بنشوف الشقة وواقف بتكلم مع السمسار لقيتها اتدخلت في الكلام وفتحت معاه حوار لدرجة إن من كتر كلامهم أنا سكت!
حاولت افهمها إنها كان ممكن تاخدني على جنب وتقولي اللي عايزاه ونتكلم فيه لكنها قالت وفيها إيه أنا اتكلمت باحترامي.
أنا متربتش على كدا واخواتي وأمي مش كدا وهي أول بنت في حياتي ومش عارف اتقبل دا إزاي، وخايف وقلقان من بعد كدا.
ممكن تشوفي كلامي تافه بس دا موقف واحد لكن دا بيحصل على طول، همَ عندهم في البيت دا عادي حتى وقت الأتفاقات بتاعة الخطوبة كانت والدتها قاعدة بتتكلم في وجود والدها، إحنا عندنا مش كدا وهي رافضة تقبل الموضوع ده وشيفاه تحكم وخنقة وأنا مش عارفة اعمل إيه خايف اسيها اخسر وخايف أكمل اندم، ما العمل؟
التعليق:
انت عايش Life style مختلف عنها تماما. هي جايه من بيت بيحترم شخصية البنت و مش شايف اي فرق بينها و بين الولد. و انت جاي من بيت لا يعترف باي دور اجتماعي للست مادام الزوج موجود.
انا شفت في شغلي ناس بتطلق عشان الست وجهت كلامها لجرسون في مطعم و هي بتختار هتاكل ايه . و الزوج بيعتبر انها كده بتهمشه وان ده تحقير لمكانته و شابف ان مادام هو موجود فالمفروض هي تقول لجوزها هتاكل ايه و هو اللي يكلم الجرسون. حتى لو كانت هي اللي عازمه جوزها و هتدفع.
دي مش منطقة صواب و خطأ لكنها بالتاكيد منطقة Life Style زي ما قلت . و خطورة المنطقه دي انها بتجمع حاجات كتير الناس بتتعامل بها في معاملاتها اليوميه . عشان كده التكافؤ في بنود المنطقه دي بين الخطيبين من اعلى درجات الاهميه.
لو كان الامر غير مقبول لك تماما في انها تكون بتمارس كل مسئوليات حياتها زي ما هي شايفه نفسها شخص عاقل بالغ حر رشيد و يقدر يشتغل و يتعامل و يقول رايه قدام اي حد يبقى اختيارك يعتبر اختيار risky جدا للاسف.
و للاسف هاضطر اقول لك انك هتحبسها في علاقه غير مناسبه و هي كمان هتجبرك على حاجات غير مقبوله بالنسبه لك فبلاش احسن.
كان المفروض قبل ما تتقدم لها تكون عارف ده عن نفسك . انك عايز بنت من طراز تاني خالص. بتحب انها دايما تعتمد على رجل يختار لها و يقرر لها و هتكون في قمة السعاده لو لقت اللي يعمل لها كده.
مش هنزهق من اننا دايما نقول للشباب اعرف نفسك الاول لان معرفتك بنفسك هتحدد لك مواصفات السمات الشخصيه للشخص اللي ينفع ترتبط به و انت سعيد انك لقيته عشان شبهك و هوكمان سعيد انه لاقاك عشان تشبه له.
يظل هناك احتمال انك لو كنت صادق معها و عرضت عليها مواصفات الشخصيه اللي انت عايزها فلو هي حسيت انها هي كمان نفسها حد هو اللي يقوم عنها بالتعاملات دي و يريحها اننا ممكن ننقذ العلاقه دي.
المهم الصراحه و الوضوح. بلاش تحبسوا نفسكم في علاقات تخلي الواحد فيكم محتاج يدفع التمن انه يتغرب عن نفسه لانه مش هيعرف يعيش الغربه دي كتير و هيتمرد في الاخر على وضع مش لاقي فيه نفسه.
