بحب شخص ومرتبطة بيه بقالي سنة، هو زميلي في الشغل. الأول كنت ببادله شعور بالإعجاب ومع الوقت حبينا بعض.
هو شخص كويس جدًا و فيه تكافؤ بيننا من جميع النواحي يعني أنا وهو تعليم في مدارس إنترناشيونال زي بعض وحتى الجامعات كنا في جامعه خاصه زي بعض بس دفعتين مختلفتين ، أهلي وأهله ثقافتهم واحدة، طيب وخلوق، ودمه خفيف وكل الناس بتشهد له بكدا، على طول بيضحكني ودي من أكتر الحاجات اللي بحبها فيه، و فوق من دا نفسه يتجوزني النهاردة قبل بكره وأنا اللي بأجل ولحد النهاردة مخلتهوش قابل أهلي ودا شيء مضايقة وبدأ يزهق مني بسببه!
أنا عارفة إننا مش دايمًا بنلاقي الحب بسهولة خاصة لو كان حب وتوافق سوا لكن مع ذلك أنا في حاجات خايفة منها ومنعاني اخد خطوة لقدام!
يعني مثلًا بالرغم من إنه جنتل مان إلا إنه ساعات أما بيتعصب بتفلت منه، يعني اكتر من مرة يقولي اخرسي أو أنا معدتش طايقك؛ وبالرغم من إنه بيرجع يتأسف إلا إني بقيت اخاف ومش ضامنه إيه اللي ممكن يحصل قدام.
غير كدا عنده مشكلة مع زمايلي وأصحابي خاصة الولاد يعني هو بيهزر عادي مع البنات في الشركة لكن لو شافني بتكلم مع حد من زمايلي حتى لو في شغل بيعملي مشكلة وأكتر من مرة يخبط ايده في الحيط وقت نرفزة بدل ما يضربني، هو بيقول إن دا غيرة وإنه بيعمل كدا عشان أنا مش موافقه إنه يقابل أهلي دلوقتي بس أنا خايفة وحتى مش عارفة اقوله إني خايفة ليزعل وفي نفس الوقت مش عارفة اعمل إيه؟!
انصحيني اخليه يقابلهم فعلًا ولا لأ؟
التعليق :
الاهانه مرفوضه تماما في اي علاقه صحيه بين اتنين. و الغيره في غير محلها باب للنكد بيدخل منه و يتربع و بيبقى صعب نقفله تاني.
اما حجة العصبيه اللي كل الناس بتتحجج بها عشان تقدر تستعملها في قهر الطرف التاني في العلاقه فحجه غير مقبوله لان مفيش حاجه اسمها جينات عصبيه. العصبيه سلوك مكتسب نتيجة التربيه و يمكن التخلص منه بسهوله و التسامح مع صفه زي دي بيفتح الباب لعواصف قويه تعصف بالعلاقه من جذورها على مدار الوقت.
عموما كل شخص ادرى بدرجة احتماله لما يقبله و لما لا يقبله. لو كنت حاسه ان الغيره و العصبيه صفات لا تقبلي التعايش معهم او مع واحده فيهم يبقى انت في علاقه لا تتفق مع مبادئك و مع اللايف ستايل بتاعك. و الافضل تبعدي عنها.
لو حاسه انك عايزه تدي فرصه و ان عندك طاقة تسامح للاختلاف ده يبقى لازم نقوم بالتالي :
- نقيس بقية تفاصيل العلاقه دي و نشوف هل فيها تحديات تانيه و نحدد مواطن التحديات التانيه و نسبتها ايه و درجة قبول كل طرف فيكم لها كبير و الا متوسط و الا منخفض.
- طبعا العلاقه الواحده تحتمل مدي مقبول من التحديات. كثرة التحديات يضر باستمرار العلاقه بصوره مستقره و طويلة الاجل زي ما المفروض الوضع يكون في الزواج. فلازم ناخد بالنا من ان الكم اللي متحملاه العلاقه دي لازم يكون مقبول واقعيا عندك عشان تنجح.
- كمان ممكن نقيس الشخص ده و مدى رغبته في التغيير. لان ممكن وعيه و ادراكه للمشكله يخليه مقدر انه محتاج يقدم درجة التغيير المطلوب في سلوكه وده ممكن يرفع درجة نجاح العلاقه .
- بعد كل ده ما يحصل هيكون وقتها مناسب انه يتقدم للاهل و انت متطمنه .
- ندي فرصه لفترة الخطوبه برده و نقيس من خلالها هل قدرته على التغيير وصلت لمستوى مقبول و مرضي لك و الا لا .
- لازم يكون مفهوم لنا ان العلاقه بين اتنين عباره عن مجموعه من التفاصيل اليوميه اللي محتاجين يكونوا مستعدين للتعايش معها بصوره مريحه لكل طرف. عشان كده لازم نوضع لها حلول من الاول – بعد تحديدها طبعا – قبل ما يحصل مشاكل كتير تخلي العلاقه دي مؤلمه بصوره تضطر الطرفين للانفصال.
التأني ضروري في العلاقه دي قبل اي تواصل مع الاهل.
