كنت مرتبطة بشخص من حوالي تلت سنين، حبيته بمعنى الكلمة وهو كمان كان بيحبني أوي، فاكرة كلمته اللي كان بيقولهالي دايمًا “إنتِ اغلى شيء في حياتي ومن غيرك معرفش اعيش”!
أنا وهو كنا في نفس الكلية، أنا كنت الطالبة وهو كان المعيد، من أول يوم دخل فيه المحاضرة وهو خطف قلبي وأنا كمان حسيت إني حركت حاجة فيه لدرجة إني كنت حاسة إن نظراته محوطاني من كل اتجاه!
أنا كنت عارفة إني مطمع لشباب كتير خاصة إني كنت في جامعة دولية وطول عمر دراستي في مدارس إنترناشيونال وأغلبنا كدا فكلنا عندنا نوع من التحرر الفكري شوية، فدا كان شيء عادي وطبيعي إنك تلاقي أكتر من شاب معجب بنفس البنت وأنا فعلًا كنت مميزة وعشان أنا كدا مكنتش شايفة أي حد فيهم لحد ما جه هو.
بقى كل حياتي بمعنى الكلمة، كل حاجة بفكر فيها أو تعني لي كان لازم أفكر فيه هو قبلها واشوف هتنفع معاه ولا لأ، كنت بحبه بجد، بحبه لدرجة إني بطلت حاجات كتير كنت بحبها عشانه أو على الأقل ما بعملهاش غير معاه هو وبس!
أنا فعليًا كنت مكتفية بيه ومش عايزة غيره، إحنا كنا متفقين على الجواز أول ما اخلص دراستي، هو مكنش عنده أي حاجة تمنعه يتجوزني بس قال لي دراستك أولى واقنعني نصبر وأنا وافقت.
كنت بشوفه كل يوم طول الخمس سنين اللي قضناهم مع بعض في كلية صيدلة مغبش عن عيني يوم، كنا بنقعد مع بعض أغلب الوقت ولما بنروح بنكلم بعض، كان جزء كبير أوي ومهم جدًا في حياتي لكن فجاءة الجزء دا اختفى؛ واختفى من غير أي مقدمات ساب لي مجموعة استفهامات مبتخلصش بالعكس دي بتكبر كل يوم عن اللي قبله ومفيش ليها أي حل.
بعد ما اتخرجنا بأيام اختفى، حاولت اتصل بيه أكتر من مرة مبيردش، كلمت مامته على تليفون البيت قالت لي إنه مش فاضي وأول ما يفضى هيكلمك، فضلت استنى يوم، اتنين، اسبوع، لحد ما لقيت صوره على السوشيال ميديا كلها هو وعروسته!
خطب واحدة غيري، طب ليه وعشان إيه معرفش، إحنا كنا كويسين خالص حتى مكنش في بينا أي زعل إيه اللي يخليه يعمل كدا مش عارفة!
حاولت اوصله بشتى الطرق كان بيهرب مني لحد ما بعت لي رسالة وقالي كفاية متدوريش عليَّ تاني أنا مش ليكِ!
خمس سنين ضاعوا من عمري هدر، اتخطبت بعدها على طول لشخص قريبي، كنت بحاول انسى اللي حصل لي بيه وهو لاحظ كدا، خد باله إني بدور على شخص تاني فيه وإنه مهما عمل مش هو الشخص اللي أنا عايزاه فسبني و قالي “أنا أسف مش هقدر اكمل كدا”.
هو كان عنده حق هيكمل إزاي مع واحدة مش عارفة تديله ذره من اللي هو بيديهولها والادهى من كدا إنها بتنفر منه طول الوقت؛ فكان لازم يمشي دا كان أنسب حل ليه وليا.
أنا حياتي اتدمرت ومش عارفة أحب ولا اتحب تاني، شريط حياتي كله وقف عند اللحظة اللي سابني فيها، ذكرياتنا مبتفارقنيش، كلامه مش قادره أنساه، قلبي لسه متعلق بيه وعنده استعداد يسامحه بس يرجع تاني رغم إني عارفة إنه مش هيرجع وفي نفس الوقت مش عارفه اعمل إيه،أنا ضاع من عمري ٨ سنين ووارد يضيع زيهم أو أكتر منهم تاني.
التعليق :
مؤلم قوي التعلق بالشخص الغلط او الشخص اللي مش مخلص كفايه.
السنين ال 8 ما ضاعوش و لا حاجه. الفرح اللي عشتيه معه و كمان الالم اللي عشتيه بعدها انضجوكي و صنعوا منك انسان جديد هتغرحي به بعدين لما المحنه دي تنتهي .
محتاجه تلجئي لمتخصص يساعدك على التعافي من التجربه القديمه و اثناء التعافي محتاجه تدي عقلك شوية قرارات يحولوا حزنك و المك لنضج. النضج الجديد بعد التعافي هيساعدك تختاري صح في المستقبل و تصنعي اجمل قصة حب.
اخاف عليكي لو ما مشيتيش في مشوار التعافي انك تخسري كل المكاسب الللي منتظراكي من نضج في الاختيار يأهلك لسعاده حقيقيه. و اخاف عليكي كمان لو لاي سبب هو رجع يكلمك انك تجري عليه بدون حرص و يتسبب لك في جرح جديد.
الحب هو اقوى ادمان و اقوى مخدر على وجه الارض لكن بفضل الله الفرق بين ادمان الحب و ادمان اي مخدر آخر ان الاحتياج للمخدر بيكون تصاعدي و بيزيد كل يوم عن اليوم اللي قبله لكن ادمان الحب مختلف تماما لان الحب رصيده جوه العقل مذبذب وده بيخليه يقل مع استمرار الالم عشان كده الانسحاب منه بيكون ممكن.
الخلاصه انك محتاجه تخرجي من دائرة ادمان هذا الشخص و ده ممكن مع متخصص و لما توصلى للتحرر و التعافي حياتك هتتحول لقصة نجاح جديده ناضجه بعون الله.
